شرح طريقة عمل هاف بوت او لكلوك كروشيه بالخطوات
بسم الله الرحمن الرحيم
ازيكم يا حبايبي عاملين ايه
موديل النهارده عباره عن هاف بوت او لكلوك كروشيه
خطواته سهله الغرزه بتاعته متماسكه جدا شكله مش بيتغير بعد اللبس
مناسب للاطفال ومناسب كمان للكبار
هنشرحه مع بعض بالتفصيل خطوه بخطوه
ولسهوله العمل هيكون في جدول المقاسات وكمان فيديو تعليمي لطريقه العمل عملي
المواصفات والخامات المطلوبه للهاف بوت
تم تنفيذ الموديل لمقاس من 36 ل 37
مع امكانيه تعديل المقاس ليناسب اي سن واي مقاس
نوع الخيط المستخدم اليزا لانا جولد كميه الخيط 110 جرام تقريبا
من الممكن استبدال نوعيه الخيط باي نوع مفضل لديكم وابره مناسبه لنوعيه الخيط
مقاس الابره 4
مقاسات اللكلوك الكروشيه
اول مقاس بنحتاجه هو مقاس عرض القدم
المقاس رقم 2 مقاس طول القدم
ودول بنلاقيهم في جداول مقاسات القدم
الجدول موجود في صفحه الجداول لينك صفحه الجداول في نهايه الصفحه
بدايه العمل بنعمل عقده البدايه وبنشتغل خمس سلاسل بنقفل في اول سلسله بمنزلقه
ممكن استبدال السلاسل بالدائره السحريه
السطر الاول
بنرتفع سلسله ودي بتكون مجرد ارتفاع وبنبدا نشتغل 8 عمود بلفه داخل الدائره اللي اتكونت نتيجه السلاسل وبننهي السطر بمنزلقه في اول عمود
السطر الثانى
نرتفع سلسله وتحسب مجرد ارتفاع
ونشتغل على اول عمود عمود امامي
ثم عمود بلفه في الفراغ بين الغرز وده بيكون عمود التزايد
ثم ننتقل على العمود رقم 2 ونشتغل عليه عمود امامي
ثم عمود بلفه في الفراغ بين الغرز وده بيكون عمود التزايد
ونستمر على نفس النمط لنهايه السطر
ليصبح عدد الغرز 16 عمود 8 عمود امامي و8 عمود بلفه ودول عواميد التزايد
السطر الثالث
بنشتغله من غير تزايد بدايه السطر بنرتفع السلسله وبتكون مجرد ارتفاع
بنروح على اول غرزه بنلاقيها عمود امامي بنشتغل عليه عمود امامي
بننتقل للعمود رقم 2 بيكون عمود عادي ده كان عمود التزايد السطر اللي فات, بنشتغل عليه عمود خلفي
العمود رقم ثلاثه بيكون عمود امامي بشتغل عليه عمود امامي
العمود رقم اربعه بيكون عمود عادي بشتغل عليه عمود خلفي
وبستمر عمود امامي وعمود خلفي لنهايه السطر
وبيستمر عدد الغرز 16 عمود 8 عمود امامي و8 عمود خلفي
وبنهي السطر بتاعي في اول عمود امامي
السطر الرابع
بنرتفع سلسله وبتكون مجرد ارتفاع اول عمود بنشتغل عليه عمود امامي
العمود رقم 2 عمود خلفي ثم عمود بلفه في الفراغ وده عمود التزايد
ونكرر عمود امامي عمود خلفي عمود بلفه في الفراغ لنهايه السطر
وبينتهي السطر في اول عمود امامي بغرزه منزلقه
لو عدينا الغرز بتاعتنا هيطلعوا 24عمود (8 عمود امامي 8 عمود خلفي 8 عمود عادي ودول عواميد التزايد)
السطر الخامس
بنرتفع سلسله وبتحسب مجرد ارتفاع
اول عمود بنشتغل عليه عمود امامي
العمود رقم 2 عمود خلفي العمود
رقم 3 عمود امامي ثم عمود في الفراغ بين الغرز
بمعنى ان التزايد في السطر رقم خمسه بيكون بعد الغرزه رقم 3
وبنكرر عمود امامي عمود خلفي عمود امامي ثم عمود في الفراغ بين الغرز وده عمود التزايد
وبنفضل نكرر على نفس النمط لنهايه السطر وبينتهي السطر في اول عمود امامي بغرزه منزلقه
طريقة اخذ مقاسات عرض القدم
بعد نهايه السطر رقم خمسه ببدا في قياس القطعه يجب ان يصل قطر الدايره لمقاس عرض القدم
لو لاحظنا في القطعه بتاعتنا هتكون مش دايره مفتوحه هتكون واخده شكل مقوس
وده العادي بنقفل الحرفين على بعض وبنبدا نقيس ونشوف وصلت للمقاس المطلوب ولا لسه
وهو مقاس عرض القدم
بشتغل الموديل بتاعي لمقاس من 36 ل 37 عرض القدم المناسب 9 سم
بكده بيكون القطعه بتاعتي وصلت للعرض المناسب
ملحوظه هامه
لكي تتمكني من عمل القطعه يجب ان تكون عدد السطور عدد فردي
بمعنى ان مقاس 37 احتاج خمس سطور
لو بتشتغلي لمقاس اكبر هتزودي سطرين وهيبقى سبع سطور
لو بتشتغلي لمقاس اكبر هتزودي كمان سطرين ويبقى عندك تسع سطور
لازم عدد السطور يكون عدد فردي لحين الوصول لمقاس عرض القدم على حسب السن والمقاس
بعد الوصول لمقاس عرض القدم المطلوب بنوقف التزايد وبنشتغل على القطعه بتاعتنا سطور بدون تزايد لحين الوصول لمنطقه ارتفاع القدم
نمط السطر بتاعنا هيكون بنرتفع سلسله وبتحسب مجرد ارتفاع
اول غرزه بتكون عمود امامي الغرزه رقم 2 عمود خلفي
الغرزه رقم ثلاثه عمود امامي الغرزه رقم اربعه عمود خلفي
وبنستمر على نفس النمط عمود امامي وعمود خلفي لنهايه السطر
وبينتهي السطر بتاعي في اول عمود امامي
وبنكرر السطر بتاعنا لحين الوصول لمنطقه ارتفاع القدم
بعد الوصول لمنطقه ارتفاع القدم بنبدا نشتغل على منطقه الكعب
لحين وصول القطعه لطول القدم المناسب على حسب المقاس
طريقة عمل كعب الهاف بوت الكروشيه
بدايه العمل على منطقه الكعب بنترك سبعه غرز من منطقه وجه القدم بدون عمل
وبنبدا نشتغل من بعد السبع غرز على النمط بتاعنا بنرتفع سلسلتين وبيحسبوا باول عمود
وبنروح على الغرزه رقم 2 وبنشتغل عمود امامي
الغرزه اللي بعدها عمود خلفي الغرزه اللي بعدها عمود امامي
لحين الوصول للجهه الاخرى مع مراعاه انه يوجد سبع غرز في منطقه وجه القدم بنتركهم بدون عمل
ثم بعد ذلك بنرتفع سلسلتين وبيحسبوا باول عمود وبنلف بالقطعه بتاعتنا على الظهر
وبيبدا نشتغل عمود امامي وعمود خلفي
(بمعنى ان سطور الكعب بتكون سطور رايح جاي سطر على الوش وسطر على الظهر)
لحين الوصول لطول القدم المطلوب
قياس طول القدم لهاف بوت كروشيه
طول القدم بنقيسه من عند نقطه البدايه لاخر سطر اشتغلناه من سطور الكعب
بعد التاكد من وصول القطعه للطول المطلوب بنبدا في تقفيل منطقه الكعب من الخلف
ثم بعد ذلك بنشتغل على حرف رقبه البوت
وده بنشتغله بغرزه مختلفه
لمشاهده الغرزه وطريقه العمل بشكل عملي تابعوا الفيديو التعليمي
لتنفيذ الموديل لاي سن ولاي مقاس يرجى الرجوع لصفحه جداول المقاسات