طريقة عمل جاكيت كروشيه بناتى مناسب للشتاء والربيع
بسم الله الرحمن الرحيم ازيكم يا حبايبي عاملين ايه
من المعروف ان دايما الكروشيه سابق بخطوه
موديل النهارده مناسب لفصل الشتاء ومناسب كمان لفصل الربيع
نفذنا مع بعض قبل كده الفستان والنهارده هننفذ الجاكيت علشان يكون تحت ايدك الطقم كامل
تقدري تنفذيه بكل سهوله
اللي حابب يشوف الفستان ده لينك صفحه الفستان
في الطريقه بالتفصيل والمقاسات وكميه الخيط وكل المعلومات اللي هتحتاجيها
والنهارده هننفذ مع بعض الجاكيت راعيت ان الجاكيت يكون بغرزه سهله زي الفستان ,علشان لو كنت لسه مبتدئه في الكروشيه تقدري تنفذي الطقم كله
بيعتمد الجاكيت على الصدر المربع لكن في ابسط طريقه
الخامات والمقاسات
اشتغلت الجاكيت بنفس مقاس الفستان من سنه لسنتين
مع امكانيه تعديل المقاس بكل سهوله
نوع الخيط المستخدم خيط صوف فاشون
وده خيط ستوك بيجي بالميزان على حسب وزن الكيس بتحاسبيه عليه
نوعيه الخيط جيده جدا ,الفتله قريبه من فتله اليزا كلاسيك
هشتغل مع نوعيه الخيط ده بابره مقاس اربعه ونص
كميه الخيط المستخدمه 250 جرام تقريبا
تحديد المقاسات
اول مقاس بنحتاجه بما ان القطعه مفتوحه وفيها زراير فبنشتغل على دوران الرقبه
ثاني مقاس بنحتاجه هو مقاس محيط دوران الذراع
المقاس رقم 3 بيكون مقاس محيط دوران الصدر
المقاس رقم اربعه طول الكم الطويل
والمقاس رقم 5 بيكون الطول الكلي للجاكيت وده متروك لك
من الممكن تنفيذ القطعه بلون واحد او تدخلي اكتر من لون
بدايه تنفيذ الجاكيت
بنشتغل سلسله بمقاس محيط دوران الرقبه زائد 5 سم ,بنراعي في السلسله انها تكون من مضاعفات العدد اربعه بشتغل القطعه بتاعتي لسن من سنه لسنتين مقاس محيط دوران الرقبه 26 سم تقريبا
ضفت عليه 5 سم واشتغلت سلسله بمقاس 31 سم
راعيت فيها تكون من مضاعفات العدد 4 طلعت معايا 56 غرزه
تقسيمه الصدر
بالنسبه لتقسيمة الصدرسهله جدا ومش محتاجه حسابات كثير
المطلوب منك حاجه واحده بس وهي ان يكون عدد غرز الكم اقل من عدد غرز الصدر او الظهر
التقسيمه اللي اشتغلت عليها كانت عباره عن( الكم 10 غرز الكم الثاني 10 غرز الضهر 18 غرزه الامام 18 غرزه بس الامام مقسوم على 2 فهيكون تسع غرز للنص اليمين وتسع غرز للنص الشمال )
وارد العدد عندك يطلع مختلف حاولي تقسمي بحيث ان يكون الكم اقل من الصدر او من الظهر
السطر الاول
بدايه السطر برتفع سلسله وبتكون مجرد ارتفاع ,وبشتغل في اول غرزه تقابلني غرزه عمود
الغرزه رقم 2 عمود
والغرزه رقم ثلاثه عمود
وبستمر على كل غرزه تقابلني غرزه عمود تسع غرز ودول المخصصين لنص الصدر اليمين
بعد ذلك بنبدا في تكوين اول زاويه وهي عباره عن سلسلتين ومش بنتخطى بيهم اي حاجه
وهي دي الزاويه بعد الزاويه بنبدا نشتغل 10 عواميد على 10 غرز ودول اللي خصصناهم للكم اليمين
ثم نبدا في تكوين الزاويه وهي عباره عن سلسلتين ومش بنتخطى بهم اي حاجه
ثم نبدا بعد ذلك في عمل 18 عمود على 18 غرزه ودول لمنطقه الظهر
ثم نكون الزاويه وهي عباره عن سلسلتين مش بنتخطى بيهم اي حاجه
بعد ذلك نبدا في تكوين 10 عمود على 10 سلاسل ودول للكم الثاني
ثم نكون الزاويه بعد الزاويه بنشتغل تسع عواميد على تسعه غرز ودول للنص الثاني من الصدر
وبكده بيكون انتهى السطر الاول وبنبدا في السطر رقم 2
بدايه السطر رقم 2
برتفع سلسله وبتحسب مجرد ارتفاع ,وبشتغل على اول غرزه تقابلني غرزه عمود
الغرزه رقم 2 عمود والغرزه رقم ثلاثه عمود وبستمر على كل غرزه تقابلني غرزه عمود
لحين الوصول لفراغ الزاويه .عندي الزاويه تحت السلسلتين بشتغل زاويه جديده
والزاويه السطر ده عباره عن (عمود سلسلتين عمود) في نفس الفراغ
بعد تكوين الزاويه ببدا اشتغل على كل غرزه تقابلني غرزه عمود لحين الوصول لفراغ الزاويه
في فراغ الزاويه تحت السلسلتين بشتغل زاويه جديده عباره عن (عمود سلسلتين عمود )
وبكمل على نفس النمط لنهايه السطر
وبنفضل نكرر في السطر رقم 2 لحين وصول قطعه الصدر للمقاس المطلوب
طبعا تقدري تدخلي اي لون انت عايزاه او تشتغلي القطعه كلها بلون واحد ده يرجع لك انت
مقاسات الصدر
بعد وصول قطعه الصدر للمقاس المطلوب بنبدا نقيس القطعه
طريقه التاكد من مقاسات الصدر
بناخد من الجدول مقاسين
اول مقاس هو مقاس محيط دوران الذراع وبنقيس الجزئيه المخصصه للكم من الزاويه للزاويه
يجب ان تصل لمقاس محيط دوران الذراع
ثاني مقاس بنحتاجه هو مقاس محيط دوران الصدر
وبنبدا نقيس جزئيه الظهر يجب ان تصل لنص مقاس محيط دوران الصدر
طريقة تقفيل الصدر المربع
بعد التاكد من وصول القطعه للمقاس المطلوب نبدا في تقفيل الكم
بدايه سطر التقفيل
بنرتفع سلسله وبتحسب مجرد ارتفاع وبنشتغل على كل غرزه تقابلنا غرزه حشو
لحين الوصول لاول زاويه
بشتغل في فراغ الزاويه غرزه حشو ثم سلسلتين واتخطى المنطقه المخصصه للكم
وانتقل على الزاويه اللي بعدها واشتغل في فراغ الزاويه غرزه حشو
وبكده بنكون قفلنا اول كم
بعد ذلك بشتغل على كل غرزه تقابلني غرزه حشو لحين الوصول للزاويه
بشتغل في فراغ الزاويه غرزه حشو سلسلتين واتخطى جزئيه الكم
وانتقل على الزاويه اللي بعدها واشتغل فيها غرزه حشو
وكده بنكون قفلنا الكم التاني بكمل السطر بتاعي على كل غرزه تقابلني غرزه حشو لنهايه السطر
بعد ذلك بنبدا ننتقل للنص الثاني من الجاكيت
وهنا بنغير الغرزه
بدايه السطر
برتفع سلسله وبتحسب مجرد ارتفاع وبشتغل في اول غرزه تقابلني غرزه عمود
بتخطى الغرزه رقم اثنين وبروح على الغرزه رقم ثلاثه واشتغل فيها (غرزه كلاستر سلسلتين غرزه كلاستر )
اتخطى غرزتين وانتقل لي الغرزه الثالثه واشتغل فيها (غرزه كلاستر سلسلتين غرزه كلاستر )
اتخطى غرزتين وانتقل للغرزه الثالثه واشتغل فيها غرزه كلاستر سلسلتين كلاستر
وبستمر على نفس النمط لنهايه السطر وبنهي السطر بتاعي بغرزه عمود في اخر غرزه
بدايه السطر رقم 2
برتفع سلسله وبتحسب مجرد ارتفاع وبروح على اول غرزه عندي واشتغل فيها غرزه عمود
بعد ذلك بنتقل ما بين غرزتين الكلاستر تحت السلسلتين وبشتغل (غرزه كلاستر سلسلتين غرزة كلاستر)
بعد ذلك انتقل لغرزتين الكلاستر اللي بعدهم واشتغل تحت السلسلتين (غرزه كلاستر سلسلتين غرزه كلاستر )
وبكمل على نفس النمط لنهايه السطر وبنهي السطر بتاعي بعمود في اخر غرزه
وبستمر في تكرار السطر رقم 2 لحين وصول القطعه للمقاس المطلوب وده متروك لك
باترون للغرزة المستخدمه
ده لينك جدول المقاسات حتى تتمكنوا من تنفيذ القطعه لاي سن وباي مقاس
ولمشاهده طريقه التنفيذ عملي تابعه الفيديو التعليمي