طريقة عمل سالوبيت كروشيه صيفى مناسب لفصل الصيف
بسم الله الرحمن الرحيم
ازيكم يا حبايبي عاملين ايه
الموديل بتاعنا النهارده عباره عن سالوبت او فستان صيفي مميز جدا وجميل
مناسب لحر فصل الصيف
اشتغلته بخيط قطن تقدري تشتغليه باي نوع خيط مفضل عندك وابره مناسبه لنوعيه الخيط
هنحتاج جدول المقاسات وهيكون كمان في فيديو تعليمي لطريقه العمل بالتفصيل
مواصفات الموديل
تم تنفيذ القطعه لسن من سنه لسنه ونص
نوع الخيط المستخدم خيط قطن تركي
مقاس الابره 3.5
كميه الخيط 170 جرام تقريبا
تعديل المقاس او اختيار مقاس مختلف هيحتاج كميه خيط مختلف
المطلوب لتنفيذ الموديل
اول مقاس بنحتاجه مقاس محيط دوران الوسط
ثاني مقاس بيكون طول الجيبه
ثالث مقاس بيكون طول الصدر
رابع مقاس بيكون طول حرده الكم
وده اللي هنشرحه بالتفصيل من خلال السطور القادمه
بدايه العمل
بنشتغل سلسله بمقاس محيط دوران الوسط
بنراعى فى السلسله بتاعتنا ان تكون من مضاعفات العدد 10
بشتغل القطعه بتاعتي لسن من سنه لسنه ونص مقاس محيط دوران الوسط 52 ل 54 سم
اشتغلت سلسله بالطول المطلوب مع مراعاه ان تكون من مضاعفات العدد 10 طلعت معايا 80 غرزه او 80 سلسله بنعدل السلسله بتاعتنا ونتاكد ان هي معدوله وبنروح لاول غرزه وبنقفل بيها بمنزلقه
بداية السطر الاول
بنرتفع ثلاث سلاسل وبنعتبرهم بعمود وبنشتغل سته عمود على ست غرز بيصبح العدد عندنا سبعه عمود
بنتخطى غرزه وبنروح للغرزه اللي بعدها وبنشتغل صدفه من اثنين عمود سلسلتين اثنين عمود
نتخطى غرزه ونكرر النمط سبعه عمود على سبع غرز
ثم نتخطى غرزه ونروح على الغرزه اللي بعدها ونشتغل صدفه من اثنين عمود سلسلتين اثنين عمود
ثم نتخطى غرزه ونكرر النمط وبنستمر على نفس النمط لنهايه السطر
السطر الثانى
بنرتفع ثلاث سلاسل وبنعتبرهم باول عمود وبنشتغل كمان ست عمود على ست غرز ثم ننتقل على الصدفه ونشتغل صدفه جديده وبتكون عباره عن ثلاثه عمود سلسلتين ثلاثه عمود
ننتقل للسبعه عمود ونشتغل عليهم سبعه عمود
ثم ننتقل للصدفه ونشتغل صدفه جديده وبتكون من ثلاثه عمود سلسلتين ثلاثه
وبنستمر على نفس النمط لنهايه السطر
بينتهي السطر في ثالث سلسله ارتفاع
السطر الثالث
بنرتفع ثلاث سلاسل وبنعتبرهم بعمود وبنشتغل كمان ست عمود
بننتقل للصدفه وبنتخطى اول اثنين عمود وبنشتغل على العمود رقم ثلاثه عمود
في الفراغ اثنين عمود سلسلتين اثنين عمود
العمود اللي بعد الفراغ على طول عمود
اخر اثنين عمود بنسيبهم ما بنشتغلش فيهم ثم نكرر النمط لنهايه السطر
مقاسات قطعة الصدر
بعد وصول الجيبه للمقاس المطلوب بنبدا نشتغل في قطعه الامام وقطعه الظهر وبيكونوا قطعتين متماثلتين
مقاسات قطعه الامام بتحتاج اللجوء لجدول المقاسات وبنطلع من جدول المقاسات المقاسين اثنين
اول مقاس بيكون طول الصدر
المقاس رقم 2 بيكون طول حرده الكم
وبنبدا نطرح طول حرده الكم من طول الصدر الناتج بيكون مقاس قطعه الصدر الاماميه او الخلفيه لانهم متماثلتين المقاسات اللي هتحتاجيها لسن من سنه ل 12 سنه هنحددها مع بعض دلوقتي لسهوله العمل
- لسن سنه هتكون قطعه الصدر مقاسها 10 سم
- لسن سنتين هتكون 12 سم
- ثلاث سنين هتكون 13 سم
- اربع سنين هتكون 15 سم ونص
- خمس سنين هتكون 17 سم
- ست سنين هتكون 17 سم ونص
- سبع سنين هتكون 18 سم
- ثمان سنين هتكون 18 سم ونص
- تسع سنين هتكون 20 سم
- 10 سنين هتكون 20 سم ونص
- 11 سنه هتكون 22 سم
- 12 سنه هتكون 22 سم ونص
طول الحمالة المناسب حسب السن
- طول الحماله لسن سنه بيكون 8 سم ونص
- طول الحماله لسن سنتين بيكون 9 سم
- لسن ثلاث سنين بيكون 10 سم
- لسن اربع سنين بيكون 11 سم
- لسن خمس سنين بيكون 12 سم
- لسن ست سنين بيكون 13 سم ونص
- سن سبع سنين بيكون 14 سم
- لسن 8 سنين بيكون 15 سم
- لسن تسع سنين بيكون 15 سم
- لسن 10 سنين بيكون 16 سم
- لسن 11 سنه بيكون 16 سم
- لسن 12 سنه بيكون 17 سم
