جداول المقاسات

طريقة عمل بلوزة كروشيه كت للاطفال والكبار

بسم الله الرحمن الرحيم 
ازيكم يا حبايبي عاملين ايه 
موديل النهارده عباره عن بلوزه كروشيه كت 
مناسبه للاطفال ومناسبه كمان للكبار
 يعني تقدري تنفذيها لاي سن وباي مقاس انت عايزاه 
هيكون متاح معانا جدول المقاسات وشرح خطوات العمل بالتفصيل
 والتنفيذ عملى عن طريق الفيديو التعليمى
الموديل سهل جدا حتى لو كنت لسه مبتدئه في الكروشيه هيكون سهل عليك تنفذيه 
الغرز المستخدمه 
غرزه العمود بلفه 
غرزه الحشو 
غرزه الصدفه 
غرزه العمود الامامي 
وغرزه العمود الخلفي

 

 

 مواصفات الموديل 

تم تنفيذ الموديل لسن من سنه ونص لسنتين مع امكانيه تعديل المقاس ليناسب اي سن واي مقاس
 نوع الخيط المستخدم خيط قطن تركي 
مقاس الابره 3.5 
كميه الخيط 170 جرام تقريبا
مع امكانيه استخدام اي نوع خيط مفضل لديكم وابره مناسبه لنوعيه الخيط 

المطلوب لتنفيذ الموديل

 اول مقاس بنحتاجه هو مقاس محيط دوران اكبر حجم 

ثاني مقاس طول البلوزه

 بدايه العمل 

زي ما ذكرنا في السطور السابقه ان اول مقاس بيحتاجه هو مقاس محيط دوران اكبر حجم 
بتحددي السن وبتنتقلي لجدول المقاسات وبتطلعي مقاس محيط دوران اكبر حجم
 بتضيفي على المقاس 5 سم وبنشتغل سلسله بالطول المطلوب 
هنراعي في السلسله انها تكون من مضاعفات العدد اربعه 
بشتغل القطعه بتاعتي لسن من سنه ونص لسنتين مقاس محيط دوران اكبر حجم 55 سم تقريبا 
ضفت عليه كمان 5 سم واشتغلت سلسله بطول 60 سم 
راعيت فيها تكون من مضاعفات العدد 4 طلعت معايا 108 غرزه
 طبعا وارد العدد عندك يطلع مختلف اهم حاجه تتاكدي ان السلسله بمقاس محيط دوران اكبر حجم زائد 5 سم 
ممكن تزودي اكثر من ال 5 سم لو حبه القطعه تكون واسعه اكتر 
نيجي بقى للتقسيمه بتاعتنا ودي مهمه جدا اول خطوه بنعملها بناخد الرقم اللي طلع معانا اللي هو 108 
وابنقسمه على اثنين هيطلع الناتج عندي 54 
هبدا اخصص للظهر 54 غرزه وللامام 54 غرزه  
الامام مقسوم على اثنين فبيكون 27 غرزه للجزء اليمين  27 غرزه للجزء الشمال 
وهي دي طريقه التقسيم ايا كان العدد اللي هيطلع معاكي هتقسمي بنفس النمط 

بعد ما بنقسم وبنعرف الارقام اللي عندنا كام بنبدا نشتغل السطر الاول
 برتفع في بدايه السطر ثلاث سلاسل وبعتبرهم باول عمود وببدا اعد من على الابره غرزه 2 3 4 اروح لي الغرزه الخامسه واشتغل فيها عمود الغرزه اللي بعدها عمود واللي بعدها عمود وبكمل لنهايه السطر على كل غرزه تقابلني غرزه عمود
 بعد الانتهاء من السطر الاول بنبدا نطبق النمط بتاعنا وده شكل النمط اللي هنشتغل عليه

 طبعا عدد العواميد ممكن يزيد او يقل على حسب المقاس وشرح طريقه الشغل بالتفصيل موجوده في الفيديو التعليمي النمط بتاعنا عباره عن سطر واحد وبنكرره
 هنفضل نكرره لغايه ما توصل البلوزه لمنطقه حرده الابط بعد وصول القطعه لمنطقه حردت الابط بنبدا في عمل التناقص وده باترون لطريقه عمل التناقص بالتفصيل 

بعد الانتهاء من عمل التناقص بنبدا نشتغل الكمر على نهايه البلوزه عدد سطور الكمر متروك ليكي على حسب رغبتك وده باترون للنمط

 بعد الانتهاء من كمر البلوزه بنبدا في تشطيب حروف القطعه وعمل مرد الزراير والعراوي 

 وده مشروح بالتفصيل في الفيديو التعليمي 

لتنفيذ الموديل لاي سن وباي مقاس يرجى الرجوع لجدول المقاسات ده  لينك جدول المقاسات

 لمتابعه طريقه العمل بالتفصيل تابعه الفيديو التعليمي 

    

لاتترددوا فى ترك اى سؤال او استفسار وسوف اجيب علية فى اسرع وقت
يوجد ايضا على المدونة العديد من موديلات الكروشيه مع باترون للغرز
وفيديو تعليمى لكل موديل ولمزيد من الموديلات والفيديوهات التعليمية
تابعوا القناة على اليوتيوب ولتنفيذ اى موديل من اختياركم
تواصلوا معى على جروب الفيس بوك اسم الجروب جنة الكروشيه