جداول المقاسات

طريقة عمل اسهل فستان كروشيه صيفى

بسم الله الرحمن الرحيم 

ازيكم يا حبايبي عاملين ايه 

موديل النهارده عباره عن فستان لفصل الصيف 

فستان كروشيه بسيط مناسب للاطفال والكبار

 من خلال جدول المقاسات تقدري تنفذي الموديل لاي سن وباي مقاس 

هنشرح خطوات العمل مع بعض خطوه بخطوه مع باترون للغرزه المستخدمه

 هسيب لكم جدول المقاسات لسهوله العمل وهيكون معانا كمان فيديو تعليمي لطريقه العمل بالتفصيل 

خامات الموديل ومواصفاته

 تم تنفيذ الفستان لسن من سنه لسنه ونص 

مع امكانيه تغيير المقاس بكل سهوله من خلال جداول المقاسات

 نوع الخيط المستخدم خيوط قطن ستوك 

مواصفات الخيط خيط تركي بالميزان الخيط قطن ومناسب لفصل الصيف

 كميه الخيط المستخدمه 170 جرام تقريبا 

مقاس الابره 3.5 

اختلاف نوعيه الخيط واختلاف المقاس من الممكن يحتاج كميه خيط مختلفه

 المقاسات المطلوبه لتنفيذ الفستان الكروشيه الصيفي 

اول مقاس بنحتاجه مقاس محيط دوران الرقبه 

الفستان مفتوح من الضهر وفيه زراير فبنشتغل على مقاس محيط دوران الرقبه

 المقاس رقم 2 محيط دوران الصدر

 المقاس رقم 3 محيط دوران الذراع 

المقاس رقم 4 طول الوسط 

جميع المقاسات متوفرة من خلال جدول المقاسات

 بدايه العمل

 بنبدا بسلسله بمقاس محيط دوران الرقبه زائد من 5 ل 7 سم

 مع مراعاه ان تكون السلسله من مضاعفات العدد اربعه

 بشتغل القطعه بتاعتي لسن من سنه لسنه ونص مقاس محيط دوران الرقبه 25 سم 

ضفت كمان 7 سم واشتغلت السلسله بطول 32 سم راعت فيها تكون من مضاعفات العدد اربعه

 طلعت معايا 76 غرزه بعد التاكد من مقاس السلسله وعدد الغرز بنزود غرزه واحده

اصبح عدد الغرز عندي 77 غرزه دلوقتي هنبدا اول سطر

 

 السطر التمهيدي

 بدايه السطر بتخطى من عند الابره ثلاث غرز وبروح على الغرزه الرابعه واشتغل فيها عمود

 الغرزه اللي بعدها عمود

 والغرزه اللي بعدها عمود 

وبكمل على نفس النمط على كل غرزه تقابلني غرزه عمود لنهايه السطر

 بعد ذلك بننفذ باقي الصدر بنفس طريقه البلوزه اللي اشتغلناها مع بعض قبل ذلك 

لمعرفه طريقه عمل الصدر المربع للفستان بالتفصيل يرجى الرجوع لصفحه البلوزه

 لينك صفحه البلوزه

بعد الانتهاء من عمل الصدر بنفس طريقه البلوزه السابقه بنبدا في تقفيل فتحه الظهر

 بنتقل لطرف الثاني وببدا اتخطى ثلاث غرز وادخل في الغرزه الرابعه واشتغل غرزه منزلقه 

وبكده بنكون قفلنا منطقه الضهر

منطقة الوسط

وبكده جزئيه الصدر انتهت هنشتغل مع بعض سطرين على منطقه الوسط

 بدايه السطر الاول 

برتفع سلسلتين وبعتبرهم بعمود وبنتقل لاول فراغ واشتغل فيه اثنين عمود 

انتقل للفراغ الثاني واشتغل فيه اثنين عمود

 انتقل للفراغ وبشتغل اثنين عمود 

وبكمل على نفس النمط في كل فراغ يقابلني اثنين عمود لنهايه السطر

 وبينتهي السطر بتاعي بغرزه منزلقه في ثاني سلسله ارتفاع 

السطر الثانى

برتفع سلسله واحده وبحسبها مجرد ارتفاع وبشتغل في اول غرزه تقابلني غرزه حشو

 ثم اتخطى غرزتين واشتغل في الغرزه الثالثه صدفه مكونه من 6 عامود 

ثم اتخطى غرزتين واشتغل في الغرزه الثالثه غرزه حشو

 ثم اتخطى غرزتين واشتغل في الغرزه الثالثه 6 عمود

 وبكمل على نفس النمط لنهايه السطر 

بدايه العمل في النصف الثاني للفستان

 اول خطوه بنتني اخر سطرين اشتغلناهم وبنبدا نشتغل في ظهر القطعه 

بيظهر عندنا سطر من العواميد بنشتغل في ظهر العواميد

 غرزه بنشتغل فيها عمود وغرزه اتنين عمود 

غرزه عمود وغرزه اثنين عمود لنهايه السطر 

لمشاهده هذه الجزئيه بالتفصيل يرجى الرجوع للفيديو التعليمي

بعد الانتهاء من هذا السطر بنبدا في عد الغرز والتاكد ان عدد الغرز من مضاعفات العدد 10

 بعد ذلك بنبدا في تطبيق النمط بتاعنا وهو عباره عن اربع سطور وبنكررهم

 السطر الاول 

بنرتفع سلسله وبتكون مجرد ارتفاع 

وبشتغل في اول غرزه غرزه حشو

 ثم ثلاث سلاسل اتخطى غرزه وانتقل للغرزه التاليه واشتغل غرزه حشو

 ثم ثلاث سلاسل اتخطى غرزتين واشتغل في الغرزه الثالثه صدفه من ثلاثه عمود ثلاث سلاسل ثلاثه عمود

 ثم ثلاث سلاسل اتخطى غرزتين واروح للثالثه واعمل حشو 

ثلاث سلاسل اتخطى غرزه واروح للثانيه واعمل حشو

 ثلاث سلاسل اتخطى غرزه واروح للثانيه واعمل حشو

 ثلاث سلاسل اتخطى غرزتين واروح للغرزه الثالثه وابدا في تطبيق النمط بين القوسين

 (اشتغل صدفه مكونه من ثلاثه عمود ثلاث سلاسل ثلاثه عمود

 ثم ثلاث سلاسل اتخطى غرزتين واروح للغرزه الثالثه واشتغل حشو

 ثم ثلاث سلاسل واتخطى غرزه واروح للغرزه الثانيه واشتغل حشو

 ثلاث سلاسل واتخط غرزه واروح للغرزه الثانيه واشتغل حشو

 ثلاث سلاسل واتخطى غرزتين )

 وبنستمر في تكرار النمط بين القوسين لنهايه السطر

 بينتهي السطر بتاعي بغرزه سلسله ثم انتقل لاول غرزه حشو واشتغل فيها غرزه نص عمود 

بدايه السطر الثانى 

 برتفع سلسله وبتحسب معايا مجرد ارتفاع وبشتغل في نفس الفراغ غرزه حشو

 ثم ثلاث سلاسل وانتقل للفراغ واشتغل حشو

 ثم ثلال سلاسل واتخطى الفراغ قبل الصدفه وابدا شغل على الصدفه 

بتطبيق النمط بين القوسين

( اروح على اول عمود في الصدفه واشتغل عمود العمود رقم 2 عمود العمود رقم 3 عمود 

في الفراغ بشتغل صدفه مكونه من اثنين عمود ثلاث سلاسل اثنين عمود

 بعد الفراغ بشتغل في اول عمود عمود العمود رقم 2 عمود العمود رقم 3 عمود

 ثم ثلاث سلاسل اتخطى الفراغ اللي بعد الصدفه وانتقل للفراغ اللي بعده واشتغل حشو

 ثلاث سلاسل وانتقل للفراغ اللي بعده واشتغل حشو

 ثلاث سلاسل اتخطى الفراغ اللي قبل الصدفه وابدا انتقل للصدفه وكرر النمط)

 وبفضل ماشيه على نفس النمط لنهايه السطر بينتهي السطر بتاعي بغرزه عمود في اول غرزه حشو 

وغرزه العمود دي بتحل محل الثلاث سلاسل

 بدايه السطر الثالث

برتفع سلسلتين وبيحسبوا معايا باول عمود

ثم ثلاث سلاسل اتخطى الفراغ قبل الصدفه وابدا اشتغل في الصدفه ونطبق النمط بين القوسين

( بشتغل على كل عمود من الصدفه عمود لحين الوصول لفراغ الصدفه

 بشتغل في قلب الفراغ اثنين ثلاث سلاسل اتنين عمود

 ثم بشتغل على كل عمود يقابلني بعد فراغ الصدفه عمود

 ثم ثلاث سلاسل اتخطى الفراغ اللي بعد الصدفه وانتقل للفراغ اللي بعديه واعمل حشو

 ثم ثلاث سلاسل اتخطى الفراغ اللي قبل الصدفه وانتقل للصدفه وابدا اطبق النمط )

وبستمر على نفس النمط لنهايه السطر وبينتهي السطر بتاعي بمنزلقه في ثاني سلسله ارتفاع 

السطر الرابع 

برتفع سلسلتين وبيحسبوا معايا باول عمود وبنتقل مباشره على الصدفه

 بشتغل على كل عمود عمود لحد ما اوصل لفراغ الصدفه

 اشتغل في الفراغ اثنين عمود ثلاث سلاسل اثنين عمود

 ثم  بعد الفراغ بشتغل على كل عمود يقابلني عمود

 ثم انتقل لي الصدفه اللي بعدها وابدا اشتغل على كل عمود في الصدفه عمود لحين الوصول لفراغ الصدفه 

اشتغل في الفراغ اثنين عمود سلسلتين اثنين عمود 

ثم اكمل على كل عمودي يقابلني عمود 

واستمر على نفس النمط لنهايه السطر

 بينتهي السطر بتاعي بغرزه منزلقه في ثاني سلسله ارتفاع

 وبكده بنكون نفذنا الاربع سطور بتوع الغرزه

 بعد ذلك في سطور التكرار هيكون في اختلاف بسيط

 وهو تغيير الثلاث سلاسل هنحولهم لاربع سلاسل

 لمتابعه تفاصيل النمط يرجى الرجوع للفيديو التعليمي 

بنفضل نكرر في النمط بتاعنا عباره عن اربع سطور وبنكررهم لحين وصول الفستان للطول المطلوب 

وبكده بنكون شرحنا مع بعض نمط الفستان خطوه بخطوه 

لمتابعه باقي التفاصيل هتلاقوها في الفيديو التعليمي

 ودي صفحه جداول المقاسات لسهوله العمل 

من خلال جداول المقاسات تقدروا تنفذوا الموديل لاي سن وباي مقاس 

صفحه جداول المقاسات

 لينك الفيديو التعليمي