شرح طريقة عمل اسهل بلوزة كروشيه صيفى بالخطوات والباترون
بسم الله الرحمن الرحيم
ازيكم يا حبايبي عاملين ايه
موديل النهارده عباره عن بلوزه صيفي جميله سهله خطواتها بسيطه جدا
حتى لو كنت لسه مبتدئه في الكروشيه هيكون سهل عليك تنفيذ الموديل ده
بتعتمد البلوزه على الصدر المربع وده هنشرحه بالتفصيل من خلال السطور القادمه
كمان هيكون في جدول للمقاسات حتى تتمكنوا من تنفيذ الموديل لاي سن ولاي مقاس
وهيكون معانا كمان فيديو تعليمي لخطوات العمل بالتفصيل
مواصفات موديل اليوم
- تم تنفيذ البلوزه لسن من سنه لسنتين مع امكانيه تعديل المقاس بكل سهوله
- نوع الخيط المستخدم خيط قطن فاشون
- مقاس الابره 3.5
- كميه الخيط 170 ل 180 جرام تقريبا
- بالتاكيد مع تغيير المقاس سيتم تغيير كميه الخيط
المقاسات المطلوبه لموديل اليوم
- اول مقاس بنحتاجه هو مقاس محيط دوران الراس
- المقاس رقم 2 بيكون مقاس محيط دوران الصدر
- المقاس رقم 3 بيكون مقاس محيط دوران الذراع
- المقاس رقم اربعه بيكون الطول الكلي للموديل وده متروك لك
بدايه العمل
بنشتغل سلسله بمقاس محيط دوران الراس ناقص 5 سم
مع مراعاه ان يكون عدد السلاسل من مضاعفات العدد اربعه
بالنسبه لمقاس محيط دوران الراس ده بنلاقيه في جداول الايس كاب
كل المقاسات المطلوبه موجوده في صفحه جداول المقاسات لسهوله العمل
بعد عمل سلسله البدايه بالطول المطلوب والتاكد من ان عدد السلاسل من مضاعفات العدد اربعه
بنعدل السلسله وبنروح لاول غرزه ونقفل بمنزلقه
بشتغل الموديل بتاعي لسن من سنه لسنتين مقاس محيط دوران الراس 45 سم
طرحت منه 5 سم واشتغلت سلسله بطول 40 سم
راعيت فيها تكون من مضاعفات العدد اربعه طلعت معايا 88 غرزه
اول خطوه لتقسيمه الصدر نطرح اربع غرز ونخصصهم للزوايا بعد ذلك نبدا في تقسيم باقي الغرز
مع مراعاه ان يكون جميع الارقام اعداد فرديه
طريقه التقسيم بالتفصيل موجوده في الفيديو التعليمي
بعد تقسيمه الصدر بنبدا عمل من منتصف الظهر
السطر الاول
برتفع سلسلتين وبيحسبوا معي باول عمود وبشتغل على كل غرزه تقابلني غرزه عمود
لحين الوصول الى منطقه الزاويه في الغرزه المخصصه للزاويه بشتغل عمود سلسلتين عمود
بعد ذلك بنتقل للغرزه التاليه واشتغل عمود الغرزه اللي بعدها عمود
وبكمل على كل غرزه تقابلني غرزه عمود لحين الوصول للزاويه التاليه
بشتغل في غرزه الزاويه عمود سلسلتين عمود
وبكمل على نفس النمط لنهايه السطر وبينتهي السطر بتاعي بغرزه منزلقه في ثاني سلسله ارتفاع
السطر الثاني
برتفع سلسلتين وبيحسبوا معايا باول عمود
ثم سلسله اتخطى غرزه وانتقل على الغرزه اللي بعدها واشتغل عمود
سلسله اتخطى غرزه وهنتقل على الغرزه اللي بعدها واشتغل عمود
واستمر على نفس النمط لحين الوصول لفراغ الزاويه
تحت السلسلتين بكون زاويه جديده عباره عن عمود سلسلتين عمود
ثم سلسله اتخط اول عمود بعد فراغ الزاويه وانتقل للغرزه اللي بعده واشتغل عمود
سلسله اتخطى غرزه وانتقل الى الغرزه اللي بعدها واشتغل عمود
واكمل على نفس النمط لنهايه السطر
وبينتهي السطر بتاعي بغرزه منزلقه في ثاني سلسله ارتفاع
السطر الثالث
برتفع سلسلتين وبيحسبوا معايا باول عمود
بنتقل على اول فراغ واشتغل فيه عمود فوق العمود بشتغل عمود
في الفراغ اشتغل عمود و فوق العمود بشتغل عمود وفي الفراغ بشتغل عمود
لحين الوصول لفراغ الزاويه بدخل تحت السلسلتين واشتغل زاويه جديده
عباره عن عمود سلسلتين عمود
وبكمل على نفس النمط لنهايه السطر
وبينتهي السطر بغرزه منزلقه في ثاني سلسله ارتفاع
وبنستمر في تكرار السطر رقم 2 والسطر رقم 3 لحين وصول قطعه الصدر للمقاس المطلوب
مقاسات الصدر المربع للكروشيه
للتاكد من وصول قطعه الصدر للمقاس المطلوب بنحتاج مقاسين
اول مقاس مقاس محيط دوران الذراع بننتقل عند جزئيه الكم ونقيس من الزاويه للزاويه
يجب ان تصل لمقاس محيط دوران الذراع
ثاني مقاس بيكون مقاس محيط دوران الصدر
بنطلعه من الجدول على حسب السن وبنقسمه على اثنين
وبنقيس جزئيه الامام يجب ان تصل لنصف مقاس محيط دوران الصدر
او مقاس محيط دوران الصدر على اثنين
بعد التاكد من وصول قطعه الصدر للمقاس المطلوب بنبدا في تقفيل الكم
سطر التقفيل
برتفع سلسلتين وبعتبرهم بعمود ثم سلسله اتخطى غرزه وانتقل على الغرزه اللي بعدها واشتغل عمود
سلسله اتخطى غرزه وانتقل على الغرزه اللي بعدها واشتغل عمود
واكمل على نفس النمط لحين الوصول الى منطقه الزاويه
بدخل تحت السلسلتين وبشتغل عمود سلسله واحده فقط عمود
ثم سلسله واتخطى منطقه الكم وانتقل على الزاويه الثانيه
اشتغل تحت السلسلتين عمود سلسله عمود ثم سلسله اتخط اول عمود يقابلني بعد فراغ الزاويه
وانتقل للعمود اللي بعده واشتغل عمود ثم سلسله اتخطى غرزه
وانتقل على الغرزه اللي بعدها واشتغل عمود واكمل على نفس النمط لنهايه السطر
وعند الكم الثاني بشتغل بنفس الطريقه وده بيكون سطر تقفيل الكم
النصف الثاني من البلوزه
بعد تقفيل الكم بننتقل للنصف الثاني من البلوزه وبنغير الغرزه وبنشتغل على نمط جديد
السطر الاول
بنتقل لاول فراغ يقابلني واشتغل فيه غرزه منزلقه
ثم برتفع سلسله وفي نفس الفراغ بشتغل غرزه حشو
ثم سلسلتين اتخطى فراغ وانتقل للفراغ اللي بعده واشتغل غرزه كلاستر من ثلاثه عمود
ثم ثلاث سلاسل غرزه كلاستر في نفس الفراغ
ثم ثلاث سلاسل غرزه كلاستر في نفس الفراغ
بمعنى ان اشتغلنا في الفراغ (غرزه كلاستر ثلاث سلاسل غرزه كلاستر ثلاث سلاسل غرزه كلاستر)
ثم بعد ذلك سلسلتين نتخطى فراغ وننتقل للفراغ التالي ونشتغل غرزه حشو
ثم سلسلتين نتخطى فراغ وننتقل للفراغ التالي ونشتغل
(غرزه كلاستر ثلاث سلاسل غرزه كلاستر ثلاث سلاسل غرزه كلاستر)
ثم سلسلتين ونتخطى فراغ وننتقل للفراغ التالي ونشتغل غرزه حشو
سلسلتين ونتخطى فراغ وننتقل للفراغ التالي ونشتغل مجموعه غرز الكلاستر
وبنستمر على نفس النمط لنهايه السطر وبينتهي السطر بتاعي بغرزه منزلقه في اول غرزه حشو
السطر الثانى
برتفع سلسلتين وبيحصلوا معايا باول عمود
اول فراغ يقابلني بشتغل فيه عمود
فوق اول غرزه كلاستر بشتغل عمود
في الفراغ ما بين اول غرزتين كلاستر بشتغل ثلاثه عمود
فوق غرزه الكلاستر رقم 2 بشتغل ثلاثه عمود
بين غرزتين الكلاستر بشتغل ثلاثه عمود
فوق غرزه الكلاستر رقم 3 بشتغل عمود
في الفراغ قبل غرزه الحشو بشتغل عمود
فوق غرزه الحشو بشتغل عمود
وبستمر بنفس ترتيب لنهايه السطر
السطر الثالث
بدايه السطر برتفع سلسلتين وبشتغل في نفس الغرزه غرزه كلاستر
ثم ثلاث سلاسل غرزه كلاستر كمان في نفس الغرزه
ثلاث سلاسل وغرزه كلاستر كمان في نفس الغرزه
ثم سلسلتين وانتقل الى الثلاثه عمود اللي اشتغلتهم في غرزه الكلاستر السطر اللي فات
اشتغل في العمود اللي في النص غرزه حشو
ثم سلسلتين وانتقل للعمود اللي اشتغلت بغرزه الحشو السطر اللي فات
واشتغل فيه مجموعه غرز الكلاستر
واكمل على نفس النمط لنهايه السطر
وبنستمر في تكرار السطر رقم 2 والسطر رقم 3 لحين وصول الموديل للطول المطلوب
شرح نمط الغرزه بالتفصيل موجود في الفيديو التعليمي
لتنفيذ الموديل لاي سن ولاي مقاس يرجى الرجوع لصفحه جداول المقاسات
لمشاهده طريقه العمل بالتفصيل تابعه الفيديو التعليمي
وبكده بنكون شرحنا الموديل مع بعض خطوه بخطوه لا تترددوا في ترك اي سؤال او استفسار