طريقة عمل بلوزة كارديجان صيفى بالخطوات
.jpeg "بلوزة كارديجان كروشيه صيفى بالخطوات")
بسم الله الرحمن الرحيم
ازيكم يا حبايبي عاملين ايه
موديل النهارده عباره عن بلوزه كروشيه صيفي مناسبه للاطفال ومناسبه للكبار
هنشتغلها مع بعض لمقاس من 10 ل 12 سنه
ولو بالمقاسات هيكون مقاس ميديام
مع تعديل بسيط لسلسله البدايه هتقدري تنفذي الموديل لاي سن وباي مقاس
هنشرح الغرزه الخاصه بالبلوزه بالتفصيل الغرزه مكونه من ثلاث سطور وبنكررهم
طبعا مع طريقه التزايد
البلوزه بتاعتنا بتعتمد على الصدر الدائري
هسيب لكم جدول المقاسات لسهوله العمل وكمان هيكون في فيديو تعليمي لخطوات العمل بالتفصيل
مواصفات البلوزه او الكارديجان
تم تنفيذ الموديل لسن من 10 ل 12 سنه
مع امكانيه تعديل المقاس ليناسب اي سن واي مقاس
نوع الخيط المستخدم خيط قطن فاشون
مواصفات الخيط خيط تركي قطن استوك
مقاس الابره 3.5 كميه الخيط 400 جرام تقريبا
ملحوظه من الممكن تغيير نوعيه الخيط باي نوع مفضل لديكم وابره مناسبه لنوعيه الخيط
بعض انواع الخيوط التي تصلح لتنفيذ الموديل
(خيط اليزا ديفا - خيط اليزا ديفا بلس - خيط قطن جولد - اي نوع خيط قطن ستوك متوفر لديكم)
المقاسات المطلوبه لتنفيذ الموديل
المقاس الاول من المعتاد مع الموديلات المفتوحه بنبدا بمقاس محيط دوران الرقبه
لكن في هذا الموديل من الممكن ان نبدا بمقاس محيط دوران الرقبه او بمقاس محيط دوران الراس
على حسب المفضل لديكم
المقاس رقم 2 بيكون مقاس محيط دوران الصدر
المقاس رقم 3 يكون مقاس محيط دوران الذراع
بدايه تنفيذ البلوزه
بنشتغل سلسله بمقاس محيط دوران الرقبه زائد 5 سم
او مقاس محيط دوران الراس طبعا على حسب السن
جميع المقاسات متوفره في جداول المقاسات وده لينك صفحه جداول المقاسات لسهوله العمل
يجب ان نراعى في سلسله البدايه ان تكون من مضاعفات العدد 9 حتى نتمكن من تنفيذ الغرزه المستخدمه
تم تنفيذ الموديل لسن من 10 ل 12 سنه
بدات بمقاس محيط دوران الراس المناسب لهذا السن وهو 50 سم تقريبا
مع مراعاه ان تكون السلسله من مضاعفات العدد 9 طلعت معايا 99 غرزه او 99 سلسله
.jpeg "بلوزة كارديجان كروشيه صيفى بالخطوات")
بدايه السطر التمهيدي
بنرتفع سلسلتين وبنعتبرهم باول عمود وبنشتغل على كل غرزه تقابلنا غرزه عمود لنهايه السطر
السطر الاول
برتفع سلسلتين وبيحسبوا معايا باول عمود وبشتغل على الغرزه رقم 2 عمود
الغرزه رقم 3 عمود والغرزه رقم اربعه عمود
ودول اربع عواميد بدايه السطر وهيفضلوا ثابتين معانا
ثم خمس سلاسل اتخطى غرزتين وانتقل للغرزه الثالثه واعمل حشو
خمس سلاسل اتخطى غرزتين وانتقل للغرزه الثالثه واعمل حشو
واكمل على نفس النمط لنهايه السطر وبينتهي السطر باربع عواميد في نهايه السطر
بمعنى ان السطر يبدا باربع عواميد وينتهي باربع عواميد وده ثابت طول الموديل
السطر الثاني
برتفع سلسلتين وبيحسبوا معايا بعمود وبشتغل كمان ثلاثه عمود
ثم خمس سلاسل انتقل لاول فراغ واشتغل غرزه حشو
الفراغ التالي بشتغل 8 عمود
الفراغ التالي حشو
ثم خمس سلاسل الفراغ التالي حشو
الفراغ التالي 8 عمود
الفراغ التالي حشو
واكمل على نفس النمط لنهايه السطر وبينتهي السطر باربعه عمود
السطر الثالث
برتفع سلسلتين وبيحسبوا معايا باول عمود وبشتغل كمان ثلاثه عمود
ثم خمس سلاسل اتخطى اول فراغ وانتقل للصدفه المكونه من 8 عمود
اشتغل على اول عمود عمود ثم غرزه بيكو
ثم عمود على العمود رقم 2 ثم غور بيكو
ثم عمود على العمود رقم 3 ثم غرزه بيكو
واكمل على جميع عواميد الصدفه
بمعنى ان اشتغل 8 عمود بعد كل عمود غرز بيكو
ثم انتقل للفراغ واشتغل غرزه حشو ثم انتقل للصدفه التاليه
وأكرر اشتغل على كل عمود عمود ثم غرزه بيكو ثم انتقل للفراغ واشتغل حشو
واكمل على نفس النمط لنهايه السطر
اخر فراغ بتخطاه وانتقل على الاربع عواميد واشتغل عليهم اربع عواميد
وبكده شرحنا الثلاث سطور نمط الغرزه بتاعتنا
.jpeg "بلوزة كارديجان كروشيه صيفى بالخطوات")
تكرار السطر الاول
برتفع سلسلتين وبيحسبوا معايا باول عمود ثم بشتغل ثلاثه عمود
ثم خمس سلاسل اتخطى اول غرزتين بيكو واروح للغرزه الثالثه واشتغل غرزه حشو
ثم خمس سلاسل اتخطى غرزتين بيكو واروح للغرزه الثالثه واشتغل حشو
ثم خمس سلاسل وانتقل لغرزه الحشو بين الصدفات واشتغل عمود بلفه
واكرر خمس سلاسل اتخطى غرزتين بيكو واروح للغرزه الثالثه واعمل حشو
ثم 5 سلاسل اتخطى غرزتين بيكو وبروح للغرزه الثالثه واشتغل حشو
ثم 5 سلاسل اتخطى غرزتين بيكو واروح لغرزه الحشو بين الصدفات واشتغل عمود
وبكمل على نفس النمط لنهايه السطر
وبينتهي السطر بتاعي باربعه عمود وده تكرار للسطر الاول
تكرار السطر رقم 2 نفس السطر رقم 2 اللي فات
تكرار السطر رقم 3 بيكون نفس السطر رقم 3 اللي فات
وهو ده النمط اللي هيفضل يتكرر معانا طبعا مع التزايد
طريقه التزايد بالتفصيل موجوده في الفيديو التعليمي وده لينك الفيديو
تقسيمة الصدر الدائرى فى الكروشيه
بعد الوصول بقطعه الصدر للمقاس المطلوب نبدا في تقسيم القطعه ووضع العلامات
اول خطوه بنعد الصدفات الموجوده عندنا في اخر سطر
بالنسبه للموديل يوجد في اخر سطر من منطقه الصدر 22 صدفه
خصصت للكم خمس صدفات
الكم الثاني خمس صدفات
الضهر ست صدفات
والامام ست صدفات بالنسبه للامام مقسوم 2 بسبب فتحه الزراير
فخصصت ثلاث صدفات للجزء اليمين وثلاث صدفات للجزء الشمال
بعد التقسيم نضع العلامات في غرزه الحشو بين الصدفات
بدات بتخصيص ثلاث صدفات لنص الصدر اليمين ثم وضعت علامه في غرزه الحشو بعد الصدفه الثالثه
خصصت للكم خمس صدفات وضعت علامه في غرزه الحشو بعد الصدفه الخامسه
الصدر ست صدفات وضعت علامه بعد الصدفه السادسه
الكم الثاني خمس صدفات وضعت علامه بعد الصدفه الخامسه
ثم ثلاث صدفات للنص الثاني من الامام
بدايه سطر تقفيل الصدر
برتفع سلسلتين وبيحسبوا معايا بعمود وبشتغل كمان ثلاثه عمود
ثم خمس سلاسل اتخطى غرزتين بيكو واروح للثالثه واعمل حشو
خمس سلاسل اتخطى غرزتين بيكو واروح للثالثه واعمل حشو
خمس سلاسل وبروح لغرزه الحشو بين الصدفات واعمل عمود بلفه
واكمل على نفس النمط لحين الوصول لغرزه الحشو مكان العلامه
بشيل العلامه وبشتغل في غرزه الحشو عمود بلفه
ثم ثلاث سلاسل واتخطى منطقه الكم وانتقل للعلامه التاليه واشتغل مكان العلامه في غرزه الحشو عمود بلفه
واكمل النمط عادي لحين الوصول لمنطقه العلامه التاليه عند الكم التاني
بنشتغل بنفس الطريقه وبستمر بالنمطر بتاعي لنهايه السطر
وبكده بنكون قفلنا منطقه الكم
بدايه السطر التالي
برتفع سلسلتين وبيحسبوا معايا باول عمود وبشتغل كمان ثلاثه عمود
ثم خمس سلاسل انتقل لاول فراغ واشتغل حشو
ثم انتقل للفراغ التالي واشتغل 8 عمود
الفراغ اللي بعده حشو
ثم خمس سلاسل وانتقل للفراغ اللي بعده واشتغل حشو
الفراغ اللي بعده 8 عمود
الفراغ اللي بعده حشو
وبكمل على نفس النمط لحين الوصول عند منطقه الكم
يوجد عند منطقه الكم عمود ثلاث سلاسل عمود
بشتغل في العمود غرزه حشو ثم في الفراغ المكون من ثلاث سلاسل بشتغل صدفه جديده من 8 عمود
ثم العمود التالي بشتغل غرزه حشو وهو ده النمط عند منطقه الكم
ثم بعد ذلك خمس سلاسل وبنتقل لاول فراغ واشتغل حشو
الفراغ اللي بعده 8 عمود الفراغ اللي بعده حشو
وبكمل النمط بتاعي عادي لحين الوصول عند منطقه الكم التاني
بشتغل بنفس الطريقه اللي ذكرناه
بعد ذلك السطر التالي بيكون تكرار للسطر رقم 3
وبنستمر في تكرار الثلاث سطور بتوع النمط بتاعنا لحين وصول القطعه للطول المطلوب وده متروك لك
تشطيب البلوزة الكروشيه
بعد وصول القطعه بتاعتنا للطول المطلوب على حسب السن والمقاس بنبدا في تشطيب فتحه البلوزه
من الجهه اليمين ومن الجهه الشمال ومن فتحه الرقبه
تبدا من الجهه الشمال من الاسفل نوصل الخيط تحت اخر عمود في اخر سطر
وببدا اشتغل على نهايات السطور كل سطر نهايته عمود بدخل تحت اخر عمود وبشتغل اثنين غرزه حشو
ثم غرزه بيكو وانتقل على السطر التالي واشتغل تحت اخر عمود اثنين غرزه حشو
ثم غرزه بيكو وبكمل لحين الوصول لفتحه الرقبه
عند الوصول لفتحه الرقبه بشتغل سلسله واحده وانتقل لغرز فتحه الرقبه
اشتغل على الغرزه الاولى حشو والغرزه الثانيه حشو ثم غرزه بيكو
واكرر اثنين غرزه حشو على غرزتين ثم غرزه بيكو
واستمر على نفس النمط لنهايه غرز فتحه الرقبه
ثم سلسله وابدا اشتغل بنفس النمط على فتحه البلوزه من الناحيه اليمين
اشتغل على نهايات السطور بنفس طريقه الشغل على فتحه البلوزه من الناحيه الشمال
وبكده بنكون اشتغلنا مع بعض البلوزه بالتفصيل خطوه بخطوه
لا تترددوا في ترك اي سؤال او استفسار